搶奶粉

 (第一罐為兒子搶回來的奶粉。攝於2012年3月18日)

BB快要出世，奶粉方面，要入定貨。

上司(即老婆大人)看了以下廣告後，決定買「美素佳兒」......

這個廣告成功的地方，不在於這些牛在那兒養，也不在於小朋友的可愛，

而在於成功擊中目標人物：所有家庭的「奶粉買入決策者」，都是「媽咪」話事。

一句：「爹地，咩咩咩咩咩啦」已經洗腦，果然犀利。

我太太看這廣告時，眼定定，非常留心，因為，電視中的「爹地」，在農場，玩得好開心。

「那個爹地」，他，彷彿已經代替我，笑著說：

「媽咪，你好叻呀，我地買美素佳兒啦」!

所以，太太轉過頭來，看著我：「麻煩你明天去買入「美素佳兒」。」

非常肯定的語氣，此刻，已沒有其他選擇。

「盤已落」，突然，我成了一名經紀。

奶粉經紀。

翌日，我找了一所藥房，走進去問：「唔該，我想要美素佳兒奶粉，初生嬰兒果隻。」

售貨員：「尼隻無貨。」

我：「吓? 哦。咁通常幾多錢一罐?」

售貨員：「大概...190蚊啦，不過而家缺貨，遲下會加價。」

「唔該」了一聲之後，向另一所藥房出發。

藥房好多人，我迫入去問：「唔該，我想要美素佳兒奶粉....」

「無貨!」售貨員飛快回應。

「哦。」我心道：「答得咁快既?」

再找另一所藥房，也是很多人，再迫入去問：「唔該，我想要美素佳兒...」

「無貨!」售貨員狠狠回應。

「嘩。」我心道：「咁恐怖? 真係成個荃灣D女人都買晒?」

問了四五間藥房，全部無貨!

開始緊張：「唔係呀，洗唔洗呀? 唔通比大陸人搶晒? 如果買罐奶粉比阿仔都買唔倒，咁我咪仲廢過電視果個爹地?」(因為我覺得他只懂在農場玩)

再找另一間藥房，好多人，大聲問：「唔該....」

「無貨!」售貨員好狠回應。

「吓? 喂大佬! 唔該都無貨?」

「無貨!」

「嘩，黐孖根! 好大壓力。 」

荃彎奶粉淪陷。

全然沒有文法。

拖著疲憊的身軀，到萬寧轉戰購入衞生巾及乳墊。

突然，看到貨架上放著

「美素佳兒」

「初生至6個月適用」

本能反應! 一個箭步，搶上一罐，貨架已成真空。

看看價錢，「二百五十八? 唔係二百咩?」

店務員：「D價升晒，遲D二百八十。」

嚇鬼! 後跳一步，看清楚，不是店務員，是位中年太太。

「咁加法，遲下會唔會五百?」我問。

「唔洗五百，四百五十我即放!」中年太太笑笑想轉談她的物業。

所有初生嬰兒的奶粉，已全部急劇起價。

全城缺貨! 奶粉淪陷!

沒有沽盤，怎麼買? 難為了奶粉經紀爸爸。

看來，奶粉，已具備列入期貨交易的條件。